- မေတ္တာဟာ ငြိမ်းချမ်းရေး တရား
မေတ္တာဟာ ကမ္ဘာ့ ငြိမ်းချမ်းရေး တရားပါ။ ပြည့်စုံအောင် ပြောရရင်တော့ သည်းခံ ခွင့်လွှတ် အနစ်နာခံ သဘောထား ကြီးတတ်တဲ့ ခန္တီရယ်၊ သနား ကြင်နာ ကိုယ်ချင်းစာတတ် စာနာ ထောက်ထား ညှာတာ တတ်တဲ့ ကရုဏာရယ်၊ သူများတွေ ကြီးပွားတိုးတက် ပြည့်စုံတာကို မြင်ရ ကြားရရင် ဝမ်းမြောက်တတ်တဲ့ မုဒိတာရယ်၊ အများအကျိုး လိုလားတတ်တဲ့ မေတ္တာရယ် (၄)မျိုး ပေါ့။ ဒီလူသား ငြိမ်းချမ်းရေး လမ်းစဉ် (၄)မျိုး မှာ အဓိက ပဓာန ကတော့ မေတ္တာပါ။ မေတ္တာမှာမှ သစ္စာတွဲတဲ့ မေတ္တာဟာ ပိုပြီး အစွမ်း ထက်မြက်၊ အရာ ရောက်ပါတယ်။ သစ္စာ လွှမ်းမှ မေတ္တာ စွမ်းပါတယ်။ သစ္စာနှင့် မေတ္တာ ပေါင်းတဲ့အခါ
(၁) အရှိတရား ကလည်း မှန်ရမယ်။
(၂) အရှိကို အခြေခံတဲ့ စကား ကလည်း မှန်ရမယ်။
(၃) မေတ္တာအာသီသ ပြုတာ၊ မေတ္တာနဲ့ တောင့်တတာ ကလည်း မှန်ရမယ်။
ဒီ အမှန် (၃)ခု ပေါင်းရမယ်။ သူများ အတွက်သာ တောင့်တ နိုင်တာ မဟုတ်ပဲ ကိုယ့် အတွက် လည်း လိုရာကို တောင့်တ နိုင်ပါတယ်။ လောဘနဲ့ တောင့်တ လို့တော့ မရနိုင် ပါဘူး။ ကမ္ဘာကျော် လူဆိုးကြီး ဘဝက ရဟန်းပြု လာခဲ့တဲ့ အရှင် အင်္ဂုလိမာလ ဟာ သားမဖွားနိုင်လို့ ဒုက္ခ ရောက်နေတဲ့ ဒုက္ခသည် အမျိုးသမီး တစ်ဦးအတွက် ဒုက္ခက လွတ်
အောင် စွမ်းဆောင် ပေးတဲ့ အခါ
(၁) လူမိုက် လူဆိုး ဘဝက လူ (၉၉၉)ယောက် ကို အခြောက်တိုက် မိုက်မိုက် ကန်းကန်း သတ်ခဲ့ပေမယ့် ရဟန်း ဖြစ်ပြီးတာနဲ့ လုံးဝ မသတ်တော့ ပါဘူး၊ ဒါဟာ အရှိအားဖြင့် မှန်ကန် ပါတယ်။
(၂) ဒီအရှိတရားကို အခြေခံတဲ့ သစ္စာစကားလည်း မှန်တယ်။
(၃) ဒုက္ခ ရောက်နေတဲ့ အမျိုးသမီး ဒုက္ခ လွတ်စေချင်၊ ချမ်းသာ စေချင်တဲ့ ကရုဏာ၊ မေတ္တာလည်း မှန်တယ်။
ဒီ အမှန် (၃)ခု ပေါင်းလိုက်တော့ တစ်ခေါက်ပဲ ဆိုလိုက် ရတယ်၊ ဒုက္ခ ရောက်နေတဲ့ အမျိုးသမီး ချက်ချင်း ဒုက္ခ လွတ်သွား ချမ်းသာ သွားတယ်။ သစ္စာတန်ခိုး၊ မေတ္တာ တန်ခိုးပဲလေ။
- မေတ္တာတွဲသော ပေးခြင်း၊ လှူခြင်း
(၁) ကိုယ့်ကျေးဇူးရှင်
(၂) အတူနေသူ
(၃) မိတ်ဆွေ
(၄) ကောင်းမှုမျိုးစေ့ ကြဲဖြန့်ရာ အကျင့်သိက္ခာ ကြီးသော သူတော်ကောင်း
(၅) ခိုကိုးရာမဲ့သူ စတဲ့..
ပေးသင့်သူတွေ အတွက် ပေးတဲ့ လှူတဲ့ နေရာမှာ သူတို့ဆီက ဘာတစ်ခုမှ မျှော်လင့် မထားပဲ မေတ္တာစစ်စစ်နဲ့ ပေးတတ်ရမယ်။ သဒ္ဓါ၊ မေတ္တာ၊ ပညာ မွှမ်းထုံထားတဲ့ စေတနာအား ကောင်းရမယ်။ သဒ္ဓါ ပညာ ကောင်းမှ ကိုယ့်အတွက် ရအောင် ယူတတ်မယ်။ သူ့ဆီက ပေးမှာ မဟုတ်ပဲ ကိုယ့် စေတနာ ကသာ ပေးမှာ ဖြစ်လို့ ကိုယ့် စေတနာ ကိုသာ အစွမ်းကုန် သန့်စင် မြှင့်တင် ပေးရမယ်။ လိုချင်တဲ့ လောဘကင်းမှ ဒါမှမဟုတ် မလိုချင်မှ အကျိုးပေး ဖွံ့ဖြိုး ကြီးကျယ်မယ်လေ။ ပေးသင့်တဲ့ သူတွေထဲမှာ ဘယ်သူ့ကိုပဲ ပေးပေး သန့်စင် အေးမြတဲ့ မေတ္တာစစ်စစ်နဲ့ ပေးရမယ်။ လူ့ဘဝမှာ ကုသိုလ်တရားဟာ အဖိုးအတန်ဆုံး ဖြစ်လို့ ကုသိုလ် ရနိုင်သည်ထိ မေတ္တာကို မြှင့်ပေးမှ ကိုယ့်မေတ္တာ အထွတ်အထိပ် ရောက်နိုင်မယ်လေ။ ဒါမှရတဲ့ ကုသိုလ်လဲ အထွတ်အထိပ် ရောက်မှာပါ။ ဒါကြောင့် ပေးတိုင်း လှူတိုင်း မေတ္တာ လွှမ်းခြုံ မွှမ်းထုံ ပေးရမယ်။ ပစ္စည်းနှင့် လူထိတော့ သတိလွတ်ရင် လောဘ ဝင်တတ်တယ်။ လောဘ အလို မပြည့်ရင် ဒေါသမီးပါ တောက်လောင် လာတတ် ပါတယ်။ ဒီတော့ ရရှိလာတဲ့ ပစ္စည်းကြောင့် မပြေမလည် ဖြစ်လို့ အပူသာ တိုးလာ တတ်တယ်။ ချမ်းသာ ပျောက်လို့ ဆင်းရဲရောက် တတ်တယ်။ ဒါကြောင့် မေတ္တာ ဖြန့်ထားရတယ်။ “ငါတို့ ပေးတဲ့၊ လှူတဲ့ ဒီပစ္စည်းနဲ့ ပစ္စည်း လက်ခံသူ ထိတွေ့သွားရင် လောဘ စတဲ့ အပူတွေ မငြိပါစေနဲ့၊ ကုသိုလ်ရရှိ တိုးပွား လာနိုင်လောက်အောင် နှလုံး စိတ်ဝမ်း အေးချမ်းပါစေ။ ဒီပစ္စည်းရဲ့ တန်ခိုး အရှိန်အဝါ စွမ်းအားကြောင့် ဘဝရဲ့ အနှစ် ကုသိုလ်တွေ တိုးပါစေ၊ ကုသိုလ် ကောင်းကျိုးတွေ ရရှိ တိုးပွားပါစေ၊ ချမ်းသာပါစေ။ ဒီပစ္စည်းကို လှေခါးထောင်၊ ငြမ်းဆင်လို့ ကုသိုလ် ပန်းတိုင် အရောက် တက်လှမ်း နိုင်ပါစေ။ ပစ္စည်း ကိုင်ထား မေတ္တာပွားလို့ အများ ကောင်းကျိုး ရအောင် စွမ်းဆောင် ပေးနိုင်ပါစေ။ ဒီမေတ္တာ စွမ်းကြောင့် ကုသိုလ် ထပ်တိုးလို့ ကောင်းကျိုး ဖွံ့ဖြိုးပါစေ၊ ချမ်းသာပါစေ” လို့ ကုသိုလ်နဲ့ အထွတ်တင်ပြီး မေတ္တာဓါတ်တွေ လွှမ်းခြုံ ပေးရမယ်။ သူရော ကိုယ်ပါ ရေတွက် မရအောင် များလှတဲ့ ကောင်းကျိုး စွမ်းအားတွေ ရလာမှာ သေချာ ပါတယ်။ မေတ္တာလည်း ပိုမြင့်မား သွားမယ်လေ။
No comments:
Post a Comment