ယောဆရာတော်ဘုရားကြီး၏ ဆုံးမစကား

• တရားရဲ့နိယာမ

တရားရဲ့ နိယာမ သဘောက “လုပ်သင့်တာ ကိုသာ လုပ်ပါ၊ ဖြစ်သင့်တာ အားလုံး ဖြစ်ပေးပါမည်၊ ရသင့်တာ အားလုံး အတိုးနဲ့ ပေးပါမည်” တဲ့။ လိုချင်တာ များပြီး လုပ်အား နည်းနေ ရင်တော့ အလို မပြည့်လို့ ကိုယ်၊ စိတ် ဆင်းရဲ ပင်ပန်းရုံ ပါပဲ။ လိုချင်တာ များပြီး လုပ်အား လွဲနေရင်လည်း အရှက်ကွဲရုံ ပါပဲ။ ရသင့်တာ လိုချင်ရင် လုပ်သင့်တာကို နည်းမှန်၊ လမ်းမှန် လုပ်ပေးရမှာပါ။

• ကိုယ့်ဟာ ကိုယ်သာ ရွေးယူပါ။

လူ့ဘဝမှာ ဘယ်သူမဆို ကောင်းတာ ရအောင် ကိုယ့်ဟာကိုယ် ရွေးယူ ကြရမှာပါ။ ကြိုက်တာကို ရွေးရမှာ မဟုတ်ဘဲ ကောင်းတာကို ရွေးရမှာ ဖြစ်ပါတယ်။ လေယာဉ်၊ မီးရထားစတဲ့ ယာဉ်များနဲ့ ခရီး သွားကြတဲ့ အခါ ကိုယ်နဲ့ တစ်ပါတည်း ယူဆောင် သွားလို့ မဖြစ်နိုင်တဲ့ ပစ္စည်းထုပ်တွေကို အများနှင့် ရောနှောပြီး စုပေါင်း တင်ဆောင် တတ်ကြပါတယ်။ ကိုယ်သွားလိုတဲ့ နေရာကို ရောက်တာနဲ့ လက်မှတ် ဖြတ်ပိုင်း ပြပြီး ကိုယ့် ပစ္စည်းထုပ်ကို ကိုယ့်ဟာ ကိုယ် ရွေးယူ ကြရပါတယ်။ လူ့ဘဝထဲ မှာလည်း ကိုယ့်ဟာ ဟုတ်တာရော၊ မဟုတ်တာရော ရောနှောနေတဲ့ အထဲက သတိဉာဏ် ဖြတ်ပိုင်းနဲ့ ပြပြီး ကိုယ့်ဟာ ဖြစ်တဲ့ ကောင်းမှု ကိုယ်ပိုင်တရား များကို အချိန်မှီ ရွေးယူကြရမှာ ဖြစ်ပါတယ်။ ကိုယ့်ဟာ ကိုယ်ပဲ ရွေးယူ ကြရမှာပါ။

• သတိဉာဏ်နဲ့ ယူတတ်ဖို့

တစ်သိန်းတန် ပစ္စည်းကို လှူတဲ့အခါ လှူပြီးတာနဲ့ တစ်သိန်းလည်း မရှိတော့ဘူး။ တစ်သိန်းတန် ပစ္စည်းလည်း မရှိတော့ဘူး။ အရင်း ပျောက်သွားပြီ ဆိုပြီး အားငယ်သွားဖို့ လိုပါသလား။ ကိုယ့်စေတနာက လည်းကောင်း၊ လှူဖွယ်ကလည်း စင်ကြယ်၊ ဗုဒ္ဓသာသနာ ကလည်း ကြီးကျယ်၊ အလှူခံ ကလည်း အကျင့်သိက္ခာ ရှိလေတော့ ကောင်းမှု အတိုးအညွန့် ရလဒ်က ရေတွက်လို့ မရနိုင် လောက်အောင် အလွန် များသွား ပါတယ်။ မဂ်ဖိုလ်နိဗ္ဗာန် အရောက် အကျိုးပေးလို့ မကုန်နိုင် လောက်အောင် သိန်း သန်း ကုဋေမက တန်အောင် အလွန်ကြီးကျယ် မြင့်မား သွားတယ်။ ကိုယ့်ဖက်က ဉာဏ်ရှိသလောက် ကြီးကျယ် များပြား သွားတာပါ။ ပြီးသွားတာနဲ့ တန်လိုက်တာဟဲ့၊ အရတော် လိုက်တာဟဲ့၊ ဝမ်းသာ လိုက်တာဟဲ့၊ သူလည်း ချမ်းသာ၊ ကိုယ်လည်း ချမ်းသာ ဝမ်းသာစရာ ကောင်းလိုက်တာဟဲ့ လို့ ကြုံးဝါး ကျူးရင့်မိမှာ သေချာပါတယ်။ အရင်း ကုန်သွားတဲ့ နောက်က ပေါ်ပေါက်လာတဲ့ အတိုးအညွန့်ကို ဉာဏ်နဲ့ မြင်အောင် ကြည့်နိုင်လို့ ဝမ်းသာ ကြည်နူး သွားတာပါ။ အခြား ကောင်းမှုများ မှာလည်း ဒီအတိုင်းပါပဲ။ သတိဉာဏ်အား ကောင်းသလောက် ရလဒ် အတိုးအညွန့် ကြီးကျယ် များပြား မြင့်မား သွားရ စမြဲပါ။ သတိဉာဏ်နဲ့ စားသောက်ရင် သီလ သမာဓိ ဝိပဿနာ ပါအောင် စားနိုင်တော့ ထမင်း တစ်လုပ် စားပြီးတိုင်း၊ ကော်ဖီတစ်ခွက် သောက်ပြီးတိုင်း ကုန်ရကျိုး နပ်တယ်ဟဲ့၊ တကယ် တန်တာဟဲ့ လို့ စိတ်ထဲက ကြုံးဝါးမိတာ မျိုးတွေ၊ သတိဉာဏ် ရှေ့က ထားပြီး ဘုရားဂုဏ် တစ်ကြိမ် ပွားပြီးတိုင်း မေတ္တာ တစ်ကြိမ် ပို့ပြီးတိုင်း တန်လိုက်တာဟဲ့၊ ကုန်သွားတဲ့ အချိန် စိုက်ထုတ် လိုက်ရတဲ့ အားနှင့် ရလဒ် ယှဉ်မရအောင် ရလိုက်တာဟဲ့၊ ဒုက္ခ ကိလေသာကို လျှော့ပေးနိုင်တဲ့ အားတွေ ဒုက္ခ ကိလေသာ လွတ်ကြောင်း တရားကောင်းတွေ တန်ဖိုး မဖြတ်နိုင်အောင် ရလိုက်တာဟဲ့ လို့ စိတ်ထဲက အားတက်မိတာ မျိုးတွေပေါ့။